የኢሕአዴግ እህት ድርጅቶች ፍልሚያ ማወዛገቡን ቀጥሏል

Views: 328

ሰኔ 15/2011 በባለሥልጣናት ላይ ለተፈፀመው ግድያ፣ የአማራ መስተዳድር ገዢ ፓርቲ አዴፓ ኀላፊነቱን እንዲወስድ የትግራይ ገዢ አቻው ሕዝባዊ ወያኔ ሐርነት ትግራይ (ሕወሓት) ባሳለፍነው ሳምንት መጠየቁ ይታወሳል። የሕወሓት ማዕከላዊ ኮሚቴ ባወጣው መግለጫ፣ አዴፓ ለግድያው ኀላፊነቱን ካልወሰደ አብሮት መሥራት እንደማይችልም አስጠንቅቋል። ሕወሓትና የቀድሞው የኢትዮጵያ ሕዝብ ዴሞክራሲያዊ ንቅናቄ (ኢሕድን) የዛሬው አዴፓ በ1980 ኢሕአዴግን ከመሠረቱ ወዲህ በጋራ ሲዋጉ፣ ሌሎች የፖለቲካ ፓርቲዎችን አስተባብረው ሥልጣን ከየዙ 31 ዓመታት በላይ ማስቆጥራቸውን የሚያወሱት የአረና ሕዝብ ግንኙነት ኀላፊ አንዶም ገብረ ሥላሴ፣ ኹለቱ እህት ድርጅቶች ያወጡት መግለጫ በግልጽ ፍቺ መፈጸማቸውን ማሳያ ነው ይላሉ።

የሕወሓት ማዕከላዊ ኮሚቴ ሰሞኑን ያደረገውን የኹለት ቀናት አስቸኳይ ስብሰባ ሲያጠናቅቅ ያወጣው መግለጫ የመድረክ ሊቀ መንበር መረራ ጉዲና (ፕሮፌሰር) እንደሚሉት፣ በትግራይና በአማራ ገዢ ፓርቲዎች መካከል ለረጅም ዓመታት የፀናው አንድነት ከፍፃሜው መጀመሪያ ላይ መድረሱን ጠቋሚ ነው።
የሕወሓትን መግለጫ ተከትሎም አዴፓ ምላሽ ሰጥቶበታል። የሕወሓት ማዕከላዊ ኮሚቴና የአዴፓ ሥራ አስፍጻሚ ኮሚቴ መግለጫ ታዲያ በበርካቶች ዘንድ መነጋገሪያ ሆኗል። የተለያዩ ርዕሰ ጉዳዮችን በማስነሳት እያነጋገረም ይገኛል።

የመግለጫው አንድምታ
ሕወሐት በመግለጫው፤ “በአሁኑ ጊዜ አገሪቷን ሊበታትን ያለው ከዚህም ከዚያም የተሰባሰበ የትምክህተኞች ቡድን ነው፤ ይህ ኀይል እንደፈለገ እንዲንቀሳቀስ ዕድል የሰጠው ደግሞ አዴፓ ስለሆነ፣ አዴፓ በአጠቃላይ ስለ ጥፋቱ፤ በፓርቲው አመራር ላይ የተፈፀመውን ግድያ በዝርዝር ገምግሞ ራሱን ተጠያቂ እንዲያደርግ፤ እንዲሁም የኢትዮጵያን ሕዝብ ይቅርታ ሊጠይቅ ይገባል” ብሏል።

ሲቀጥልም፤ በጄኔራሎቹና በአመራሮቹ ላይ የተፈፀመው ግድያ በሐሳብና በተግባር በቀጥታና በተዘዋዋሪ እጃቸው ያለበት የውስጥና የውጭ ኀይሎች ገለልተኛ በሆነ አካል በአስቸኳይ ሊመረመር ይገባል፤ ውጤቱም ለሕዝብ በየጊዜው በግልፅ መነገር አለበት ሲል ያሳስባል።

የተቋሞች ኀላፊዎችና የፀጥታ ተቋማት መሪዎች ተገቢውን ኀላፊነታቸውን ባለመፈጸማቸው ለተፈጠረው ጥፋት ተጠያቂ መሆን አለባቸው ይላል መግለጫው።
ይህ አለመስማማት ከዚህ በፊትም በመካከላቸው የነበረ ነው፤ በማለት መነሻው የጋራ ግብ አለመኖሩ ነው ሲሉ ለአዲስ ማለዳ የገለጹት መረራ፣ ባልና ሚስት እንኳን 27 ዓመታት አብሮ ሲኖር ይሰለቻቻል፤ የፓርቲዎቹም ሁኔታ የሚያሳየው ይህንን ነው ሲሉ ገልጸዋል።

እንደመራራ ገለጻ፣ በኢሕአዴግ ታሪክ በዚህ መልኩ ወደ አደባባይ ወጥቶ አንዱ ሌላውን መተቸት የመጀመሪያ ነው። ይህ ደግሞ ምን ያህል ሥር የሰደደ ችግር በመካከላቸው እንዳለና የአገሪቷ ዕጣ ፈንታ አደጋ ላይ መሆኑን የሚያሳይ ነው። ሕወሓት ለውጡን ተከትሎ ከማዕከላዊ መንግሥት የተገለለ ሲሆን፣ አሁን ከአዴፓ ጋር በጀመረው የቃላት ጦርነት ወደ ማዕከላዊ መንግሥት የመመለስ ፍላጎት እንዳለው ጠቁሟል ሲሉም ያክላሉ።

የኢትዮጵያ ዜጎች ለማኅበራዊ ፍትሕ (ኢዜማ) የሕዝብ ግንኙነት ኀላፊ ናትናኤል መኮንን በበኩላቸው፤ ኹለቱ ፓርቲዎች ከበፊት ጀምሮ የነበራቸውን የእርስ በርስ ችግር መቆም አለበት ብለው ያመኑ ይመስላል ሲሉ ይጠቁማሉ። እስከዛሬ በድብቅ ይደረግ የነበረው ፍልሚያ አሁን ገሃድ በመውጣቱ ነው አዲስ የመሰለው እንጂ አዲስ አይደለም ይላሉ። አሁን ግን አንዱ የአንዱ የበታች ሆኖ መታየት አለመፈለጉ የቃላት ጦርነቱን ከፍ እንዳደረገው በማውሳት።

የአንዶም ሐሳብ ከመረራ እና ናትናኤል የተለየ ነው፤ የሁለቱም መግለጫ ትኩረት ለመሳብ የተደረገ ፖለቲካዊ ጨዋታ ነው ሲሉ ይገልጹታል። ፓርቲዎቹ በሚመሩት ሕዝብ እየተጠሉ በመምጣታቸው፣ ለሕዝባቸው ወገንተኛ ለመምሰል ያደረጉት ይመስለኛል ብለዋል።

ችግሮቻቸውን በኢህሕአዴግ ሥራ አሰፈጻሚ ስብሰባ ላይ በማንሳት መወያየት ይችሉ እንደነበር የሚያወሱት አንዶም፣ ላለፉት 27 ዓመታት ላኪና ተላላኪ ሆነው ሕዝቡን ሲጎዱ እንደነበር በመዘንጋት፣ ወቃሽና ተወቃሽ ሆነው መቅረባቸው አሳፋሪና ለአገሪቱም መልካም ነገር ይዞ የማይመጣ ብለውታል።

የአዲስ አበባ ዩኒቨርሲቲ ፌደራሊዝም መምህሩ ሲሳይ መንግሥቴ (ዶ/ር) በበኩላቸው፣ ተንኳሽ መግለጫ ያወጣው ሕውሓት ለተፈጠረው ውዝግብ ኀላፊነቱን መውሰድ እንዳለበት ያስረዳሉ። የአዴፓንም መግለጫ አማራጭ የሌለው ትክክለኛ ሲሉም ይገልጹታል።

ፖለቲከኛው ልደቱ አያሌው፣ ኢትዮጵያ ውስጥ አሁን ለተፈጠረው ችግር የተጠያቂነት ደረጃ እናውጣ ከተባለ ቀዳሚው ሕወሓት ነው የሚሆነው ባይ ናቸው። አለበለዚያ ደግሞ በጥቅል የኢሕአዴግ አባል ድርጅቶች ናቸው የሚሆኑት ይላሉ።

አንድን ክልል እየመራ ያለን ድርጅት ለይቶ በዚህ ደረጃ ተጠያቂ ለማድረግ መሞከር፣ ማስፈራራትና ሥም ማጥፋት አሁን ካለው ነገር አንጻር ሁኔታዎችን የሚያባብስ እንጂ መፍትሔ የሚሆን እንዳልሆነም ይናገራሉ።

ሕወሓት ጸብ አጫሪ የሆነ መግለጫ አውጥቷል ሲሉ የገለጹት የኦሮሞ ፌደራሊስት ኮንግረስ (ኦፌኮ) ምክትል ሊቀ መንበር ሙላቱ ገመቹም በልደቱ ሐሳብ ይስማማሉ፤ ሕወሓት፣ አዴፓ የገጠመውን ችግር ተገንዝቦ ከጎኑ መቆም በሚገባው ሰዓት እንዲህ ዓይነት መግለጫ መስጠቱ አሳፋሪ ነው ሲሉ ይገልጻሉ።

ፓርቲዎቹ ለሥም አብረው አሉ ቢባልም እንደተለያዩ የሚያምኑት የአዲስ አበባ ዩኒቨርስቲ የሕግ መምህር የሆኑት ፋሲል ስለሺ፣ በኹለቱ መግለጫ የታፈኑ ሚስጥሮች ሊወጡ ከጫፍ መድረሳቸውን ጠቋሚ ነገር መኖሩን አሳይቶናል ይላሉ። ይሁን እንጂ አንዱ ተሳዳቢ ሲሆን ሌላው የአጸፋ መልስ መስጠቱን ፋሲል ብዙም ምቾት የሚሰጥ ሆኖ አላገኙትም።

የሕወሓትና አዴፓ ግጭት እና የኢሕዴግ ህልው
ሕወሓት በመግለጫው፣ “…ፀረ ሕዝብ የትምክኽት ኀይሎች የቆየውን ኋላቀር ሕልማቸውን ለማስፈጸም እንደ ሕዝብ ትምክኽተኛ ተብለሃል በማለት ሕዝብን እያደናገሩ ይገኛል። በአማራ ሕዝብ ሥም እየነገዱ በአሉባልታ ወሬ ሕዝቡ ላይ እንደ መዥገር ተጣብቀው ደሙን ለመምጠጥ አኮብኩበው እየጠበቁ ይገኛሉ፤” ሲል አዴፓን ከሷል።

አዴፓ በበኩሉ፣ “ጅራፍ ራሱ ገርፎ ራሱ ይጮሃል” እንደሚባለው አገራችን አሁን ለምትገኝበት የፖለቲካ ብልሽት ዋነኛ ተጠያቂ ትሕነግ/ሕወሓት ሆኖ የአማራን ሕዝብ ህልውናና ክብር የማይመጥን መግለጫ አውጥቷል ብሏል። የኹለቱ እህት ድርጅቶች የቃላት ጦርነት ከእነሱም አልፎ ለኢሕአዴግም ህልውና አስጊ ነው የሚሉ ወገኖች ተበራክተዋል።

እንደ ናትናኤል ገለጻ፣ ኹለቱም ፓርቲዎች በመግለጫቸው ሌሎቹ እህት ድርጅቶች ከጎናቸው እንዲሰለፉ ጥሪ አቅርበዋል። ይህ ደግሞ መሪ ድርጅቱን ኢሕአዴግን አደጋ ውስጥ ይከተዋል።

መረራም በናትናኤል ሐሳብ ይስማማሉ፤ ድርጅቶቹ በዚህ መልኩ ከቀጠሉ አንዱ ሌላውን ሊያፈርስ ይችላል ይላሉ። አሁን ባለው አሰላለፍ ሕወሓት ከግንባሩ ቢወጣ እንኳን ሌሎቹ የኢሕአዴግ አባል ድርጅቶች አብረው ይቀጥላሉ የሚል ሐሳብ የላቸውም። ስለዚህም በቅርብ ርቀት ሌሎቹ አባል ፓርቲዎች ሊያፈነግጡ ይችላሉ ብለው እንደሚያስቡ መረራ ይናገራሉ።

አገሪቱ በለውጥ ጎዳና ላይ ሆና አጣብቂኝ ሁኔታ ውስጥ ባለችበት ወቅት፣ ኹለቱ ፓርቲዎች የገቡበት ጦርነት ለኢሕዴግ ፈተና ሊሆንበት እንደሚችል በማውሳት። የኹለቱ የኢሕአዴግ አባል ድርጅቶች የቃላት ጦርነትም በኢሕአዴግ ህልውናም ላይ ብቻ ሳያበቃ በኢትዮጵያ ፖለቲካ ላይ ሥጋት መደቀኑ እንደማይቀር ናትናኤል ያወሳሉ።

ሲሳይ ግን በኹለቱም ሐሳብ አይስማሙም፤ የሕውሃት ራሱን ማግለል ለሌሎቹ አደጋ ሊሆን አይችልም በማለት። የዐቢይን አስተዳደር የደርግ አስተዳደር ሲል መግለጹን የሚናገሩት ሲሳይ፣ ሕውሓት ከሌሎቹ ሦስት ድርጅቶች ራሱን በመለየት ጥጉን በመያዙ፣ ሌሎቹ ያላቸውን ኅብረት አጠንክረው እንዲሔዱ ያደርጋቸዋል እንጂ ሥጋት ሊሆንባቸው አይችልም ባይ ናቸው።

የፓርቲዎቹ ግጭት ሕዝቡን ይወክላል?
ኹለቱም ድርጅቶች ባወጡት መግለጫ ሕዝቡን አሞካሽተዋል። አዴፓ የአማራና የትግራይ ሕዝቦች ታሪካዊ አንድነትና ውሕደት ያላቸው፣ ባሕላዊና ጥንታዊ ሃይማኖታዊ እሴቶችን የሚጋሩ፣ በጋብቻና በደም የተሳሰሩ፣ በፀረ-ጭቆና ትግል ከሌሎች ሕዝቦች ጋር ሆነው በአንድ ጉድጓድ ክቡር መስዋዕትነት እየከፈሉ አሁን ላለንበት የአገረ መንግሥት ምሥረታ ጉልህ አሻራ ያሳረፉ ሕዝቦች መሆናቸውን በመግለጽ፣ ትሕነግ/ሕወሓትና መሠል እኩይ ድርጅቶች የትግራይ ሕዝብ ከአማራ ሕዝብ ጋር ያለውን ወንድማዊና ቤተሰባዊ ግንኙነት እንዳያሻክሩ፣ በፅናት እንዲታገሉ ጥሪ አቅርቧል።

ሕውሓትም በበኩሉ፣ የአማራ ሕዝብ እንደማንኛውም ሕዝብ ለሰላም፣ ልማት፣ ዴሞክራሲ ብሎ መስዋዕትነት በመክፈል አዲሲቷን ኢትዮጵያ በመፍጠር ረገድ የማይተካ ሚና የነበረውና ያለው ሕዝብ ነው አሞካሽቷል። ኹለቱም ሕዝቡን አስመልክተው የሰጡት ሐሳብ ከልብ ይሁንም አይሁን የሕዝቡ ጨዋነት ለጥያቄ የሚቀርብ አይደለም የሚሉ አንዳንዶች ናቸው።

ናትናኤልም በዚህ ሐሳብ ይስማማሉ፣ የትግራይም ሆነ የአማራም ሕዝብ በአሁኑ ወቅት አሁን ከገባበት ችግር መውጣት እንጂ፣ ወደ ሌላ አሳሳቢ ውጥረትና ግጭት ውስጥ የመግባት ፍላጎት የለውም። ሕዝቡ የራሱ እምነት እስካለው ድረስ የፖለቲካ ፍላጎት ያላቸው ኀይሎች የሚፈልጉትን ነገር ያደርጋሉ ብለው አያምኑም።
የአማራም ሆነ የትግራይ ሕዝብ ጦርነት ወዳድ አይደለም፤ ጨዋ ነው ይላሉ ሲሳይ። ይሁን እንጂ በኹለቱም ውስጥ ያንን የሚፈልጉ አካላት መኖራቸው ይታወቃል ሲሉም ጸብ አጫሪ ግለሰቦች መኖራቸውን ያስታውቃሉ።

መረራ፣ ሕዝቡ ጦርነቱ እርሱን የሚወክል አለመሆኑን ይረዳል ብለው ያምናሉ። እንደ ፕሮፌሰሩ እምነት በሕወሓት እና በአዴፓ መካከል የሚደረገው ፍትጊያ ደግሞ የፓርቲዎቹና የፓርቲዎቹ ብቻ ነው የሚሆነው።

የኹለት ፓርቲዎች ግጭት፣ ያውም የጥቂት ግለሰቦች ጨዋውን ሕዝብ ሊያጋጨውም ሆነ ሊለያየው አይችልም የሚሉት ፋሲል፣ ይህ ታላቅ ሕዝብ በማይረባ ነገር ይጋጫል ብሎ ማሰብ ስህተት መሆኑን ያስረዳሉ።

እንደ መፍትሔ
እንደ መረራ የመፍትሔ ሐሳብ፣ ስለ ሀገር ከሆነ የምናወራው አሁን ባለው ተጨባጭ ሁኔታ የኢሕአዴግ አባል ድርጅቶች ከራስ ቡድን ፍላጎትና ጥቅም በላይ፣ የአገር ጥቅም የሚያሳስባቸው ከሆነ አማራጩ እርስ በርስ መካሰስ፣ የፖለቲካ ሽኩቻው ውስጥ መግባት ሳይሆን አንድ ላይ መቆም ነው።

27 ዓመታት ሙሉ የበደሉትን ሕዝብ ለመካስ የሚፈልጉ ከሆነ መፍትሔው ጥሎ መውጣትና መወነጃጀል አይደለም የሚሉት ልደቱ ፤ መድረኩ ውስጥ ሀቀኛ የሆነ ትግል አድርጎ ችግሩን በጋራ እንዲፈታ ማድረግ ነው መፍትሔው ብለዋል። ኢህአዴግ እንደ አንድ ድርጅት መቆም የሚጠበቅበት ጊዜ ዛሬ መሆኑን አስታውሰው፣ በዚህ ሰዓት አኩርፎ መውጣት የኢትዮጵያን ችግር የበለጠ ያወሳስበዋል እንጂ መፍትሔ የሚሰጥ አይመስለኝም ይላሉ።

ይህ ሐሳብ ከፋፋይ መሆኑን የሚናገሩት ናትናኤል፤ አሁን ኢትዮጵያዊያኖች በአጀንዳ በተለያየ መልኩ ተከፋፍለን እርስ በርስ የምንታገልበት ወቅት መሆን የለበትም ብለዋል። አንድ ላይ ሆነን ይህንን ችግር ተወጥተን ሕዝቡ ወደ ሚፈልገው አቅጣጫ ይህችን አገር ለማሻገር ነው መጣር ያለብን በማለት።

የሙላቱ ሐሳብ ከዚህ የተለየ ነው፤ በአራቱ የኢሕአዴግ አባል ፓርቲዎች መካከል ያለው ፖለቲካዊ ቀውስ እየቀጠለ ከሔዶ አገር ሊያፈርስ እንደሚችል የሚጠቁሙት ሙላቱ፣ በዚህ ሁኔታ ውስጥ አገሪቱን ሊታደጓት የሚችሉት የመከላከያ ሠራዊቱና የፀጥታ አካላት መሆናቸውን አስረድተዋል። በመሆኑም የመከላከያ ሠራዊቱና የፀጥታ አካላቱ ከፓርቲዎቹ የፖለቲካ ወላፈን ራሳቸውን ጠብቀው፣ አገሪቱን ከቀውስ ለመታደግ ራሳቸውን ማዘጋጀት አለባቸው ሲሉ አሳስበዋል።

በጠቅላይ ሚኒስትር ዐቢይ የሚመራው ኢሕአዴግ የአገሪቱን ዕጣ ፈንታ በብቸንነት ተቆጣጥሮ እያለ በኀላፊነት ስሜት መሥራት አቅቶት የሚበታተን ከሆነ እርሱ ውስጥ የሚፈጠረው መበታተን ለአገርም ሊተርፍ ይችላል የሚል ሥጋት አላቸው – መረራ።

እንደሲሳይ ገለጻ፣ ይህ ትልቅ አገርና የሕዝብ ኀላፊነት ያለባቸው መሆናቸውን አውቀው ከመቼውም በላይ ከግል እንዲሁም ከቡድን ስሜትና ፍላጎት በፀዳ መልኩ ከፖለቲካ ሽኩቻ በፀዳ መልኩ አብረው መስራት አለባቸው። አዴፓም አሁን ባለበት ሁኔታ በከፍተኛ ደረጃ ሊረዳ የሚገባው ነው። ከፍተኛ አመራሮቹ ተገድለውበት ተዳክሟል። ይህንን ድርጅት በዚህ ወቅት ለማጥቃት መሞከርም ተገቢ አይደለም ይላሉ።

የኢሕአዴግ ጥምር ፓርቲዎች ውስጥ እየታዩ ካሉት ነገሮች በመነሳት በጥምረቱ ውስጥ በአንድነት የመቆየት ዕድላቸው የመነመነ ይመስላል የሚሉት ሙላቱ፤ ቢሆንም ግን አገሪቱ ወደ ምርጫ እየሔደች በመሆኗ ያሉባቸውን ችግሮች አቻችለው ለዚያ ሲሉ አብረው ሊቆዩ ይችላሉ ሲሉ ተስፋ አድርገዋል።

ቅጽ 1 ቁጥር 37 ሐምሌ 13 2011

Comments: 0

Your email address will not be published. Required fields are marked with *

This site is protected by wp-copyrightpro.com