ከሴት አሽከራካሪዎች እንማር!

Views: 82

“ሲቄ” የሚለው የኦሮምኛ ቃል ‹አለንጋ› የሚል ትርጉም አለው። በገዳ ትውፊታዊ አስተዳደር ውስጥ በባሏ ጥቃት የደረሰባት ሚስት፣ ከሌሎች ሴቶች ጋር በመሆን ባሏ ላይ የካሣ ውሳኔ የምታሳልፍበት ስርዓት ሲቄ ይባላል።

ስለመንገድ ላይ የመኪና ግጭትና አደጋ የተነሳ እንደሆነ ጉዳት አድራሽም ተጎጂም ወንድ አሽከርካሪዎች ናቸው። ለዛ ይሆናል በየመንገዱ የሚለጠፋ መልዕክቶች፣ ምክሮችና ማሳሰቢያዎች ሁሉ ለወንዶች የተፃፋ የሚመስሉት፤ ‘አሽከርክር ረጋ ብለህ’፣ ‘ቀበቶህን እሰር’ ዓይነቶቹን ማለቴ ነው።

በመንገድ ላይ እንቅስቃሴዎች ሴቶች የበለጠ ጠንቃቃዎች የመሆናቸው ነገር ጥናት አያሻውም። ያገለገሉ ተሽከርካሪዎችን የሚገዙ ሰዎች ስለተሽከርካሪው መስማት ከሚፈልጉት መልካም ዜና መካከል ‘የሴት መኪና ነው’ የሚለው አንዱ ነው።

በሴት ተይዞ የቆየ ከሆነ ይመርጡታል፤ ጠንቃቃ መሆኗ ይታወቃላ! የሴት አሽከርካሪዎች ቁጥር ሲጨምር የመንገድ ላይ የተሽከርካሪ ግጭትና አደጋ ይቀንሳል ብዬ አምናለሁ። እንደውም ‘ሃምሳ ሃምሳ’ው በሥልጣን ድልድል ብቻ ሳይሆን በመንገድም ተግባራዊ እንዲሆን ብንጠይቅስ!?

ብዙ ጊዜ ደፋር መሆንና መፍጠን የአሽከርካሪነት ብቃት ተደርጎ ይቆጠራል፤ ስህተት ነው። ሴቶች ጠንቃቃ የሆኑት መፍጠን ስለማይችሉ ወይም ስለሚፈሩ የሚመስለውም አለ፤ ኹለተኛ ስህተት። እውነታው ጠንቃቃ አሽከርካሪዎችን የሚገድባቸው ፍርሃት አለመሆኑ ነው። ይልቁንም በጨበጡት መሪ እያንዳንዱ እንቅስቃሴ ኀላፊነት ይሰማቸዋል።

‘በመተሳሰብ እንጂ በሕግ አይተዳደርም’ በሚባልለት የአዲስ አበባ የተሽከርካሪ መንገድ ላይ፤ እግረኛም አሽከርካሪም መሆን ያሰጋል። እንደውም እንደብዙ ቸልተኛና ችኩል አሽከርካሪዎችም ሆነ እግረኞች ቢሆን ኖሮ፤ አሁን እያየንና እየሰማን ካለነው የባሰ አደጋ ይከሰት ነበር። ግን ጥቂትም ቢሆን ጠንቃቃና አስተዋዮች አሉ፤ ከእነዚህ መካከል የሚበዙት ሴቶች ናቸው።

ዲያቆን ዳንኤል ክብረት እንደሚለው፤ አሠራራችንም ቢሆን አጥፊውን ይቀጣል እንጂ መልካም የሠራን አያመሰግንም። ቢሆን ኖሮ በመንገድ ላይ በጥንቃቄያቸው የሚመሰገኑና አርዓያ ይሆኑ ዘንድ ሊታወቁ የሚገባቸው ሰዎች አሉ። ከእነዚህም መካከል ከወንድ አሽከርካሪዎች አንፃር ጥቂት ቢሆኑም ሁሉም ሴት አሽከርካሪዎችን በዚህ ዓውድ ማግኘታችን አይቀርም።

በነገራችን ላይ ነገሩን በተሽከርካሪ ጉዳይ አነሳን እንጂ በመንገድ ቆሻሻም ላይ ተመሳሳይ ነው። ሴቶች መንገድ ላይ አይፀዳዱም/አይሸኑም። ቆሻሻም ቢሆን ብዙዎቹ መንገድ ላይ አይጥሉም። መንገድ ላይ የሚቀርቡ ፍራፍሬና መሰል ምግቦችንም ብዙ ሴቶች መንገድ ላይ አይጠቀሙም፤ በጥቅሉ በብዛት ሴቶች ለመንገድ ንፅሕናም ይጠነቀቃሉ ማለት ነው።

ይህን ስናነሳ በተለምዶው ‘ወንዶች…ሴቶች’ በሚል ንፅፅር አይደለም። በተፈጥሮ የሰው ልጅ እኩል ተደርጎ ቢፈጠርም በማኅበራዊ አኗኗር በፆታ የተከፋፈልናቸው ተግባራት አሉ። በኢትዮጵያዊነት ማኅበራዊ ኅብረታችንም ሴት ልጅ ጠንቃቃና ቁጥብ እንድትሆን የሚያዝዝ ስርዓት ተሠርቷል። ይህ ነገር ሊኖረው የሚችለው አሉታዊ ተፅዕኖ ይቆየንና፤ በጎ ተፅዕኖው ግን ብዙ ጠንቃቆችን አትርፎልናል። እንግዲህ ወንድሞች፤ ለመንገድ ላይ ደኅንነታችንም ሲባል እንደእህቶቻችሁ ጠንቃቃ ሁኑ ለማለት ነው።

መቅደስ /ቹቹ/
mekdichu1@gmail.com

ቅጽ 1 ቁጥር 33 ሰኔ 15 2011

Comments: 0

Your email address will not be published. Required fields are marked with *

This site is protected by wp-copyrightpro.com