ግልጽ ደብዳቤ ለጠቅላይ ሚኒስትር ዐቢይ አሕመድ

Views: 405

ጉዳዩ፦ ኢትዮጵያ ከሰላም ሚኒስቴሯ ይልቅ የመቻቻል ሚኒስቴር እንዲኖራት ስለመጠየቅ
በእርስዎ የሚመራው ኢሕአዴግ ወደ ሥልጣን ከመጣ ወዲህ በአገሪቱ እየታየ ያለው የመልካም ጅማሬ ለውጥ ይበል የሚያሰኝና የወደፊቷን ያደገችና የዜጎቿን መብት የምታከብር አገር እንደምትሆን ተስፋ ያደረጉና ያደረግን ኢትዮጵያውያን ብዙዎች እየሆንን ነው። እንደሚታወቀው እየተካሔደ ያለው ለውጥ የብዙዎችን ሕይወት የበላና እየበላ ያለም ነው። ይህ ከአዝጋሚነቱ ይልቅ በሰበር ዜናዎች የተጥለቀለቀው ፈጣን ለውጥ ይዞት የመጣው በረከት የመኖሩን ያክል እርግማኑንም እያየነው ነው።

ታፍነው የነበሩ የዘርና የሃይማኖት ችግሮች ይህንን አጋጣሚ ተጠቅመው በየቦታው እየታዩ መሆናቸው የምርቃት እርግማን ሆኖብኛል። እነዚህን በየቦታው ብቅ ብቅ እያሉ ያሉትን ግጭቶችና አለመረጋጋቶች ለማስወገድ ማዕከላዊ መንግሥቱ በሆደ ሰፊነት ምክንያት ተገቢውንና አፋጣኙን እርምጃ እየወሰደ ባለመሆኑ ጥፋቶቹና ውድመቶቹ የሚያስደነግጡ እየሆኑብኝም ነው።

በመከባበርና አብሮ በመኖር የሚታወቀው ሕዝባችን ከዚህ ተቃራኒ በሆነ መንገድ የተለያዩ አስፀያፊና አስነዋሪ ድርጊቶችን ሲፈፅም መመልከቱ በተለይም በሰው አገር ላይ ሆነው ሲያስቡት ያማል፣ ያቆስላል! ክቡር የሆነውን የሰውን ልጅ ከእነ ሕይወቱ ዘቅዝቆ ሰቅሎ መግደል አረመኔ እየተባለ የሚወገዘው አዶልፍ ሂትለር እንኳን ያልፈፀመው ዘግናኝና አስነዋሪ ድርጊት ነው። ከዚህ በተቃራኒው በደቡብ ክልል የሆነውን ስናይ ደግሞ ሙሉ ለሙሉ ሕዝባችን አስነዋሪ ድርጊትን ይፈፅማል ብለን እንዳናስብ ያደርገናል። እርጥብ ቄጤማ ይዞ ተንበርክኮ ወጣት ልጆቹን ከጥፋት የሚመልስ የመልካም አባት ስብስብም እንዳለን የሚያሳይ ነው። እርግጥ ነው ያለፉትን ኻያ ሰባት ዓመታት ጥበብ የሌለው ትውልድ ተፈጥሯል። ታላላቆቹን የማያከብር፣ የአገር ፍቅር ማለት ምን ማለት እንደሆነ የማይገባው፣ በመሰደዱ ኩራት እንዲሰማው የሆነ፣ ዕውቀት ማለት ዲግሪና ዲፕሎም ከመጫን ባለፈ ክኅሎት የሌለው፣ በአቋራጭ መክበር ሥልጣኔ የሚመስለው እና የመሳሰሉት ፀባይ ያለው ትውልድ ተፈጥሯል።

በተጨማሪም ከአገራዊ ማንነቱ ይልቅ በጎጡ እንዲያስብም የተደረገ ትውልድ ተፈጥሯል። እውነት ነው እርሶም ኢትዮጵያን ደጋግመው ሥሟን እያወደሱ ያክብሯት እንጂ የሚመሩት የጎጥ ፓርቲ ነው። ለእኔ የለውጡ ትልቁ ቁልፍ አሁንም በእርሶ እጅ ያለ ቢሆንም እስከ አሁን ላደረጓቸው የመልካም ጅምር ለውጦች ምስጋና ቢገባዎት ነው እንጂ አያንስቦትም።

ክቡር ጠቅላይ ሚኒስትር
እንደው ዝም ብዬ በጥሞና ኢትዮጵያ ምንድነው የጎደላት የሚለውን ሳስብ አንድ ድሮ የነበረን አሁን ግን ያጣነው መቻቻልን ነው። መቻቻል የሚጀምረው ከቤት ነው። ባል ሚስቱን፣ ሚስትም ባሏን፣ ወንድም እህቱን፣ እህትም ወንድሟን፣ እናትና አባት ልጆቻቸውን፣ ልጆቻቸውም እናትና አባቶቻቸውን የመቻል ተፈጥሯዊ ስጦታ የተሰጣቸው ይመስለኛል፤ ምክኒያቱ ያ ባይሆን ኖሮ አይደለም ለዓመታት ይቅርና ለአንድ ሰከንድም ቢሆን አብረን ልንቆይ አንችልም። እርሶና ባለቤትዎ ስንት ጊዜ ተጋጭታችኋል? ስንት ጊዜስ አስቀይመዋቸዋል? እርሳቸውስ ስንት ጊዜ አስቀይመዎታል? መቼም ሁልጊዜም ከልጆችዎ ጋር ሰላም እንደማይሆኑም አምናለሁ። ሁሉንም ግን ያለፉት ስለ ፍቅርና ሰላም ሲሉ በመቻልዎ ነው። ሕዝባችን የሃይማኖት ልዩነት ሳይገድበው፣ የዘርና የፖለቲካ ልዩነት ብዙም ሳይረብሸው በእድርና ዕቁቡ፣ በበዓልና ሐዘኑ እየተደጋገፈና እየተጋገዘ እዚህ ደርሷል። አሁን ግን ይህንን መቻቻል አጥቷል፤ ስለሆነም መንግሥትዎ መቻቻል ላይ ቢሠራ እመክራለሁ።

የመቻቻል ሚኒስቴር (Ministry Of Tolerence)
ሁላችንም እንደምናውቀው እርስዎ ወደ ሥልጣን ከመጡ በኋላ በአገሪቱ ሰላም እንዲመጣ በማሰብ የሰላም ሚኒስቴር ማቋቋምዎ ይታወቃል። በሥሩ የተለያዩ የሕግ አስከባሪ አካላትን የያዘው ይህ ሚኒስቴር በዋናነት በአገሪቱ ውስጥ ሰላም እንዲመጣ በትብብር ይሠራል። በርግጥ ስለ ዓላማው ማቋቋሚያ አዋጁ በድረ ገፅ ላይ ለማንበብ ፈልጌ ባለማግኘቴ ሳይሳካልኝ ቢቀርም፥ ሰላምን ከማስፈን በዘለለ ሊኖረው የሚችል ግብ እንደሌለ ግን እገምታለሁ።

ተቋሙ ግብና ተልዕኮው እንዲሁም ዓላማው ከተቀመጠለት ማዕቀፍ ውጪ ሊሔድ እንደማይችልና የተገደበ እንደሆነም ግልጽ ነው። በመሆኑም የመቻቻል ሚኒስቴር ቢቋቋም ግን ሰላምን ግቡ ያደረገ ሥራው ደግሞ ከቤት የሚጀምር በዘላቂነት በመላው አገሪቱ ሰላምንና መከባበርን የሚያመጣ ይሆናል የሚል እምነት አለኝ። አሁን በአገራችን እየተከሰቱ ያሉት ችግሮች የሰላም ማጣት ሳይሆን የመቻቻል እጦት፣ የብሶት ድምርና ብዜት ውጤቶች ናቸው። ሰላም ለአንድ አገር መሠረቷ ብቻ ሳይሆን ኅልውናዋም ጭምር ነው። ይህንን ሊጠብቁላት የሚችሉ በርካታ የጎንዮሽ ሥራዎች መሠራት አለባቸው። አንዱ ብሔር ከሌላው፣ አንዱ ሃይማኖት ተከታይ ከሌላው እንዴትና በምን አግባብ አብሮ መኖር እንዳለበት፣ የጋራና የወል ዕሴቶችን እንዴት መጠበቅ እንደሚቻል፣ አብሮ በመኖር ሒደት ውስጥ የሚያጋጥሙ መሰናክሎችንና ፈተናዎችን በጥበብ እንዴት መኖር እንደሚቻል በመቻቻል ውስጥ በግልጽ ይታያል። መቻቻል ግለሰባዊ፣ መቻቻል ቡድናዊ፣ መቻቻል ብሔራዊና አገራዊ ነው።

ክቡር ጠቅላይ ሚኒስትር፣ ከኹለት መቶ በላይ ብሔረሰቦች የሚኖሩባት የተባበሩት አረብ ኤመሬት ዜጎች አንድም ቀን በዘር፣ በሃይማኖት፣ በቋንቋም ይሁን በፖለቲካ ልዩነት ሲጋጩም ሆነ ሲጋዳደሉ ታይቶም ተሰምቶም አይታወቅም። በርግጥ አንዳንድ የፖለቲካ ተንታኞች ይህንን ካላት የነዳጅ ሀብት ጋር ቢደምሩትም ከእርሷ ጋር ስትወዳደር ምንም የሌላት ኢንዶኔዢያ በስድስት መቶ ብሔረሰቦች አንድም ቀን ሥሟ በክፉ ተነስቶ አያውቅም፤ ምናልባት የዛሬ አንድ ዓመት ግድም ኹለት ከመቶ በሚሆኑት ክርስቲያኖች ላይ ጥቂት እስልምና አክራሪዎች ከፈፀሙት ጥቃት በስተቀር ይህ ነው የሚባል በአገር ደረጃ ስጋት የሚፈጥር ግጭት ተከስቶ አያውቅም። ታዲያ እኛ ሰማንያ ብሔር ብሔረሰቦች ሆነን እንዴት መቻቻል አቃተን? ትላንት ነበረን የምንለውን የበጎነት መልካም ባሕሪያቶቻችንን ማን ወሰደብን? ትናንትናም የነበሩት የእኛ ወላጆች ዛሬ ደግሞ ያለነው እኛ የወላጆቻችን ልጆች!!!

ክቡር ጠቅላይ ሚኒስትር፣ ያጣነውና የጠፋብን መቻቻል ነው። ቤታችን ያለውን መልካምነት ወደ ጎረቤቶቻችን ከማጋባት ይልቅ በንፉግነት በክፋት ተስፋፍተናል። የሰላም ሚኒስቴርን እርስዎ ለምን ዓላማ እንዳቋቋሙት ጠንቅቀው ቢያውቁትም ለእኔ በግብ ደረጃ የሰላም ሚኒስቴርን አቋቁሞ ሰላምን ለማስፈን መሞከር መድረሻን መሳት ይመስለኛል።

የመቻቻል እሴቶችና ጥቅሞች

  • በመቻቻል ውስጥ ወጣቶች ከተለያዩ ግጭት ቀስቃሽ ከሆኑ ድርጊቶች እንዲቆጠቡ ማድረግ፣
  • ባሕላዊና ሳይንሳዊ የመቻቻል ፍልስፍናዎችን በመቻቻል ሚኒስቴር ውስጥ በጥናትና ምርምር እንዲዳብሩ ማድረግ፣
  • ቤተሰብ ለአንድ የተረጋጋ አገር መሠረት በመሆኑ ለመቻቻል የመሠረት ድንጋይ መሆኑን ማስተዋወቅ፣
  • መቻቻልን በአገር ውስጥ ለማስፈን የመንግሥትን ሚና ከማኅበረሰቡ ጋር በማስተጋበር ማጉላት፣
  • መቻቻል የስብጥር ባሕሎች ስብስብ፣ አብሮ የመኖር ውብ ዜማ፣ የመከባበርና አንዱ የሌላውን መብት የማክበር ድምርና ብዜት ውጤት መሆኑን ማስገንዘብ፣
  • መቻቻል ከአንድ ማኅበረሰብ የዕለት ከዕለት የኑሮ መስተጋብር የሚመነጭ፣ በጋራ ለጋራ ጥቅምና አብሮነት ዜጎች የሚያዳብሩት ከማኅበራዊ ዕሴቶቻቸው ውስጥ አንዱና ዋነኛው ማድረግ፣
  • ማኅበረሰቡን ከሚያለያዩት ነገሮች ይልቅ የጋራና አንድ በሚያደርጉት ነገሮች ላይ እንዲያብር ማድረግ፣
  • የመቻቻልን ጥቅምና መርሖዎች የሕዝብ እንደራሴዎች በሚገባ እንዲያውቋቸው አድርጎ አገሪቷ የምታወጣቸው ሕጎች በዚህ ማዕቀፍ እንዲቃኙ ማድረግ፣
  • የመቻቻል ሚኒስቴር ከሰላም ሚኒስቴርነት በተሻለ ችግሮች ከመከሰታቸው አስቀድሞ ኅብረተሰቡ ግንዛቤ እንዲኖረው በማድረግ ረገድ ከመሠረታዊ ፍልስፍናው በመነሳት የተሻለ ተደራሽነት ያለው መሆኑ፣
  • በአንድ ወቅት ሔለን ኬለር እንዳለችው “የትምህርት የመጨረሻው ውጤት መቻቻል ነው” ብላ ነበር እናም ማኅበረሰባችን ስለመቻቻል የሚኖረውን ግንዛቤ መሠረት ለማስያዝ ከአንደኛ ደረጃ ትምህርት ቤቶች ጀምሮ እንደ አንድ የትምህርት ዓይነት ቢሰጥ፣
  • ሮበርት ግሪን ኢንገርሶል በበኩሉ “መቻቻል ማለት አንተ እንዲሆኑልህ የምትፈልጋቸውንና የምትጠይቃቸውን ነገሮች ለሌሎችም አለመንፈግ ነው” እንዳለው ይህ ማለት መቻቻል ግለሰቦች ለእኔ ብቻ በሚል ከንቱ ስግብግብነት ታውረው ሌሎችን ማዳከሚያ እንዳያደርጉበት ንቃተ ሕሊናን የማሳደግ ሥራ ሊሠራበት እንደሚገባ ያመለክታል።

ብሔራዊ የመቻቻል ቀን ፌስቲቫል

ይህንን ሐሳብ ወደ ማኅበረሰባችን ለማስረፅ ብሔራዊ የመቻቻል ቀን ፌስቲቫልን በአገር ዐቀፍ ደረጃ ማክበር ብንጀምር፦

  • የተጀመረውን ለውጥ ከማስቀጠል አንፃር መሬት የሚያስረግጥ መሆኑን፣
  • ዜጎች የጋራ የሆነ ዕሴታቸውን ለማሳደግ ዕድል የሚሰጥ መሆኑን፣
  • አብሮ የመኖር ይትባሕላችንን ከሚደርሱብን መገዳደሮች ለመጠበቅና በተቀዳጀናቸው መልካም የለውጥ ጅማሮዎች ላይ በጋራ እንድንፈትሽና የተሻለ ነገን ለማመለከት፣
  • አንደኛው ባሕልና አኗኗር የሌላኛውን ባሕልና አኗኗር እንዲያውቅና እንዲጠብቅ፣
  • የአብሮነት፣ ወንድማማችነት፣ እህትማማችነትና ቤተሰባዊነት ስሜትን በዜጎች መካከል ለመፍጠር ቁልፍ ሚናን ስለሚጫወት

የአከባበሩ ይዘት
ከዚህ ቀድምም ሆነ እስከ አሁንም ድረስ ኢትዮጵያችን የብሔር ብሔረሰቦች ቀንን ስታከብር ከርማለች። በየዓመቱ እስከ አርባ ሚሊየን ብር የሚደርስ ውጪ ሲበላ የከረመው ይህ ቀን፥ ግለሰቦች ኪሳቸውን ሲያደልቡበት ከመክረማቸው በቀር ፍፁም ዓላማውን ስቶ የተጓዘ መሆኑም ለማንም ግልጽ ነው። ይህ ቀን ዓላማውን አሳክቶ ቢሆን ኖሮ ይህ ሁሉ እልቂት በዜጎች ላይ ባልደረሰ ነበር። አንደኛው ብሔር በሌላኛው ብሔር ላይ እጁን ለማንሳት የሞራል ልዕልናንም ባላገኘ ነበር። ስለሆነም ከትናንት ስህተት በመማር እንዳይደገም ይህንን ጠባሳ የሚሽር ብሔራዊ ቀን ያስፈልገናል።

ይህንን ቀን በአሸሼ ገዳሜ ከማሳለፍ ይልቅ ጥናታዊ ጽሑፎች፣ የየብሔሩ ባሕላዊ ጭፈራዎችና አመጋገቦች፣ በተማሪዎችና በትምህርት ቤቶች መካከል የጥያቄና መልስ ውድድሮች፣ ሲምፖዚየሞችና ወርክሾፖችን ለተከታታይ ሦስት ወይም አራት ቀናት በማካሔድ የተሻለ መቻቻልን ያሳየ ክልል የሚሸለምበትና ዕውቅና የሚሰጥበት፣ በበጀትም በድጎማ መልክ ለክልሉ ማጠናከሪያ የሚሰጥበት ቢሆን ክልሎች የተሻለ የመቻቻል ዓላማን ለማሳካት ትልቁን ሚና ይጫወታሉ።

ክቡር ጠቅላይ ሚኒስትር፣ እዚህ ድረስ ከደረሱ የጽሑፌን ሙሉ ሐሳብ አግኝተውታል ብዬ እገምታለሁ። ስለ ውድ ጊዜዎትም ከልብ አመሰግናለሁ። እንደቃልዎ ተገኝተው ሥልጣን ሳያጓጓዎ በምርጫ ተሸንፈው መንበርዎን ለማስረከብ ያብቃዎ እላለሁ!!!
ዳግማዊ ሲሳይ
(የሬዲዮ እና ቴሌቪዥን ጋዜጠኛ)
ከቤልጂግ ሄል ከተማ

ቅጽ 1 ቁጥር 14 የካቲት 9 ቀን 2011

Comments: 0

Your email address will not be published. Required fields are marked with *

This site is protected by wp-copyrightpro.com